धूर- धूर- गुबार देखते रहे..

सुनके हमार करेजा धौंकनी लेखा धकर धकर करत रहुवे

उनकर गाड़ी तेजी से आगे सरसराईल बढ़ल चल गउवे, आ हम पाछा से खाली ओकर धुआं देखत रह गईनी।

आस्ते आस्ते आसमां पूरा धूर से भर गईल, आ गाड़ी छोट होत होत बिला गईल।

हम उनका से तब्बो ना बता पइनी, जब ऊ हमरा क्लास में पहिलका हाली पढ़े अईली।

तब्बो ना बोल पईनी जब उ हमार मोहल्ला छोड़ के दोसर शहर में जात रहली।

तब्बो ना बता पईनी,जब उ हमरा इन्हां आपन बियाह के कार्ड देवे अइल रहली।

कोशिश त भरसक कईनी, लेकिन तब्बो ना बता पईनी जब ओकर लोर से भरल आँख आपन मरद के पिटला के खिस्सा चीख चीख के बतावत रहे।

आ किस्मत के खेला देखीं, आज जब बतावे के हिम्मत जुटवनी ह, त चाहियो के ना बता सकेनी। काहेकि उ हमेशा खातिर जा तारी - "सफेद कपड़ा में लपेटल, अर्थी पर"....

कुणाल भारद्वाज