बदमाशी के पिटारे से......

बात ओह बेरा के ह जब हम छोट बच्चा रहनी आ देखा देखी हमरो ट्यूशन पढे के इच्छा होखे त गाँव में ही हमार ट्यूशन के व्यवस्था हो गईल । रोज समय से पढे जाईं आ कुछ महीना ले खूब मन से पढे । घरे आके जवन टास्क मिले तवन रोज समय से पूरा होखे आ जल्दिए सर के चहेता बन गईनी । परिणाम ई भईल कि सर के घरे रखल कैरमबोर्ड हमरा चलते आऊर लईका लोग खातिर फ्री हो गईल आ अब हमनी के पढे के टाईम से आधा घंटा पहिले पहुँच जाई सन आ पढला के बाद आधा घंटा फेर खेल के आईं जा लेकिन एही खेल में अब पढाई से दूरी बने लागल । अब हम पढे ना जाईं , बस कैरम खेले जाईं आ जेह दिन टास्क ना बने ओ दिन बढिया से थुराई होखे हमार । हम रो - गा के ओही काम के ओजा करीं आ घरे खातिर फेर जवन मिले तवन ओहिजा पूरा होखे । एक दिन काम ना बनल रहे तबो सर दोसर काम देनी ओजा बनावे के आ इ हमरा इ डर मिलल कि जदि आज वाला आ काल्ह वाला काम दुनु बन के ना आईल त कस के पीटाई होई । हमरा इ बात का जाने काहे ना सुनाईल । हम घरे आके ओह दिन वाला टास्क बना लेनी आ पिछला दिन वाला छोड़ देनी । जब अगिला दिने गईनी त मन में इ रहे कि आज ना पीटाएम लेकिन हाय रे हमार भाग । सर के याद रहे आ जब पन्ना पलट के हमरा से पिछला दिन के काम ना बनला के कारण पूछनी त हम सीधा सीधा जवाब दे देनी कि इ ना बनल रहे तवना खाति हम काल्ह पीटा गईल रहनी , एही से ना बनवनी ह । सर हमार जवाब सुन के खिसिया गईनी आ हमार फेर ओह दिन देह पर गर्दा झरा गईल ।